MUKAMI KIMATHI

Alice Mukami

Alice Mukami Kimaathi

Mzalendo Alice Kimaathi

Askari hodari wa Mau Mau

Mukami gorila mashuhuri mijini na vijijini na msituni

Mukami kiongozi wa kikosi kabambe cha wanawake

Mukami na wanawake, wanawake wazalendo wa Mau Mau

Mbiu ya mgambo ilipolia kutangaza vita vya uhuru na mashamba

Vita vya kupambana dhidi ya wakoloni na mahomugadi wao

Mukami hakusitasita aliamua kimoja

Akafuatana na mumewe Kimaathi kwa hiari yake mwenyewe

Akawa sehemu ya maelfu ya wanajeshi wanawake wa Mau Mau

Waliyokuwa sababu ya ufanisi mkuu wa Mau Mau

Mukami alitambua jukumu lake

Kama Mkenya na kama binadamu

Kweli Mukami ni jazanda la ushujaa wa wananchi

Siku ya kuwapamba mashujaa wa uhuru wa Kenya itakapofika

Tutampamba Mukami kwa dhahabu na almasi

Anaishi hadi wa leo Mukami anaishi kwa uzalendo

Anaishi Njabini Nyandarwa Mukami Kimaathi

Serikali ya mahomugadi wa jana na leo inayotutawala

Inaendelea kumnyanyasa mama yetu mpendwa

Inakataa kumuonyesha Mukami kaburi la mumewe Kimaathi

Maadui wakubwa wa uhuru na ukombozi wa taifa letu

Wanaovuruga na kuparaganya historia yetu ya mapambano

Wanaendelea kukana Mau Mau na kina Alice Mukami

Wanaendelea kuwashindilia katika kasumba ya dini

Bali kina Mukami

Hawana haja ya kutambuliwa na wasaliti wa Mau Mau

Wanafahamu

Ingawa juhudi zao ziliung’oa ukolonimkongwe

Mapambano bado yanaendelea

Kwani ukoloni-mamboleo ungalipo

Mukami, bado kina Mukami wanahitajika

Na watahitajika hadi uhuru kamili

Na sisi leo

Lazima tupambane kwa vyovyote vile

Tujikaze kisabuni

Mateso na majaribu tilatila

Tunayaona

Na tutaendelea kuyaona

Mwandawiro Mghanga

Jela Kuu ya Kibos

Juni 4 1988